Halin Kunci: Dangote Ya Sake Tausayawa Al'umma, Ya Rage Farashin Mai a Najeriya - YANCI HAUSA NEWS

 Halin Kunci: Dangote Ya Sake Tausayawa Al'umma, Ya Rage Farashin Mai a Najeriya

Daga: YANCI HAUSA NEWS 

Duba da halin kunci da al'umma ke ciki musamman a wanna lokaci, Matatar Dangote ta sake rage farashin mai 

Kamfanin na Dangote ya dauki matakin ne duba da halin da ake ciki a Najeriya musamman a wannan lokaci na bukukuwan karshen shekara 

Wannan ba shi ne karon farko ba da kamfanin ke rage farashin saboda a watan Nuwambar 2024 ma ya rage zuwa N970

 Matatar mai na Aliko Dangote ta sake rage farashin man fetur a Najeriya yayin da aka fara bukukuwan karshen shekara. 

Kamfanin ya rage farashin mai zuwa N899 kan kowace lita domin saukakawa al'umma a wannan lokaci. 

Wannan na kunshe ne a cikin wata sanarwar da daraktan hulda da jama'a, Anthony Chiejina ya fitar a yau Alhamis 19 ga watan Disambar 2024, karamar yadda Daily Trust ta rahoto.

Kamfanin ya bayyana cewa matakin ya zama dole domin taimakawa 'yan Najeriya da sauƙin wahala a lokacin bukukuwan ƙarshen shekara. 

“Matatar mai a Afirka ta farko ta Dangote wanda ta rage farashin mai zuwa N970 a kowace lita a ranar 24 ga watan Nuwamba."

 "Yanzu ya sake sanar da sabon farashi na N899 a kowace lita."

 "Wannan rangwamen an yi shi ne domin rage tsadar sufuri a lokacin bukukuwan karshen shekara da ake ciki.” - Cewar sanarwar 

NNPCL ya karbi bashi domin tallafawa Dangote 

A baya dai Kun ji cewa, kamfanin NNPCL ya karbo bashin dala biliyan 1 domin tallafawa aikin matatar Dangote a lokacin da matatar ta shiga wata matsala. 

An rawaito cewa Mele Kyari ya jagoranci sauye-sauye a NNPCL, wanda ya kai ga samun riba a karon farko cikin shekaru masu yawa.